Mercadona despide de maneira arbitraria mentres o persoal ten que asumir unha sobrecarga de traballo brutal
A CIG concentrouse na tenda da Avda de Oza da Coruña para esixir a readmisión dunha traballadora
A Coruña -
A CIG concentrouse este luns diante do Mercadona de Avda. de Oza (A Coruña) para amosar o máis rotundo desacordo cos despedimentos que está executando a empresa de maneira totalmente arbitraria e inxustificada. Dende o pasado mes de decembro, houbo cinco despedimentos en distintas tendas da provincia, aínda que poderían ser máis xa que a empresa non traslada esta información como debería á representación legal do persoal.
![](https://cig.gal/imaxes/adaptadas/780/files/novas/2021/02/15/Mercadona/21-02-15_ConcentracionDespedimentosMercadona_ACorunha_006.jpeg)
A presidenta do comité da Coruña e delegada da CIG, María López Alejos, lembra que o persoal de tendas está sometidoconstantemente a un control exhaustivo das súas funcións, practicándoselles “preavaliacións e avaliacións” de minuciosocontrol e supervisión, nas que se recollen apreciacións que son absolutamente subxectivas, xa que non dependen de criterios prefixados e coñecidos, senón do que valore en cada momento a persoa encargada da tenda.
Desas avaliacións depende en gran medida que se cobre ou non a prima anual, mais tamén serven para aplicar despedimentos á carta, tal e como lle aconteceu a unha traballadora do supermercado da Avda. de Oza, da que se demandou a súa readmisión durante a concentración deste luns. Para López Alejos, atrás deste despedimento “hai un acto de persecución por parte de Mercadona contra aqueles traballadores e traballadoras que exercen os seus dereitos laborais”.
Despedimentos á carta
![](https://cig.gal/imaxes/adaptadas/780/files/novas/2021/02/15/Mercadona/21-02-15_ConcentracionDespedimentosMercadona_ACorunha_009.jpeg)
Con estas prácticas, denuncia, Mercadona consegue botar a quen lle veña en gana, sustentando os despedimentos en supostos incumprimentos dos métodos de traballo internos "que en numerosas ocasións lle solicitamos por escrito, pero que xamais accederon a proporcionárnolos, xerando unha indefensión total ás traballadoras/es".
Sinala a presidenta do comité que os métodos son tan exhaustivos que resultan imposíbeis de cumprir durante toda a xornada laboral, especialmente dende o inicio da pandemia debido á sobrecarga de traballo que está a asumir o persoal polo incremento das vendas.
Porén, as consecuencias non son iguais para todas as traballadoras/es, e ante o mesmo incumprimento unhas veces prodúcese unha apertura de sanción, noutras emítense actas de reprimenda (que na práctica Mercadona utiliza como sancións nas cartas de despedimento) e noutros casos non acontece nada.
![](https://cig.gal/imaxes/adaptadas/780/files/novas/2021/02/15/Mercadona/21-02-15_ConcentracionDespedimentosMercadona_ACorunha_014.jpeg)
López sinala que non se entende que un incumprimento sexa motivación suficiente como para proceder ao despedimento emenos aínda que este se aplique de forma selectiva e discriminada. Casualmente, matiza, "a quen acabandespedindo é ás persoas que teñen o atrevemento de facer valer seus dereitos laborais. O certo é que dependendo da decisión de quen coordina a tenda e das directrices que dende RRHH lle encomenden, poderás acabar facilmente despedido/a con independencia de se es unha boa ou mala traballadora", manifesta.
Sobrecarga de traballo en todas as tendas
Xunto a isto, advirte que dende o inicio da pandemia, e deforma xeneralizada nas 23 tendas da provincia, estase asoportar unha enorme carga de traballo e o persoal atópasetotalmente extralimitado en funcións "aínda que a empresa segue a aseverar que teñen o persoal preciso e escúsanse en problemas de organización e a imprevisibilidade da situación".
Non obstante, o control exhaustivo de tarefas acrecentouse "e segue recaendo na subxectividade da opinión do/a encargada/o de tenda (coa colaboración do departamento de RRHH) a decisión de abrir actas, amoestacións, sancións e suspensos nestas avaliacións persoais a quen non se dobregue ante as esixencias de renunciar a exercer os seus dereitos laborais, atendendo unicamente a dar total prioridade ás necesidades de incrementar a produtividade nas tendas".
![](https://cig.gal/imaxes/adaptadas/780/files/novas/2021/02/15/Mercadona/21-02-15_ConcentracionDespedimentosMercadona_ACorunha_004.jpeg)
A este respecto refírese á persecución que sofre o persoal que cae de baixa, chegando a darse casos de traballadoras/es a quen Mercadona lles puxo vixilancia privada para controlar o que facían; a dificultade coa que se atopan as mulleres embarazadas para acceder á suspensión de contrato por risco en cumprimento dos protocolos de prevención; as complicacións para acollerse ás reducións de xornada por coidado de menor que a empresa formalizan con carácter de “revisable mensual/semestral”; así como a negativasistemática das solicitudes horarias en materia de conciliación da vida familiar e laboral.
"Perseguen a identificación de disidentes do seu sistema/modelo de traballo (que chaman Modelo de Calidade Total) que Mercadona debe de pensar que está por enriba do Estatuto dos Traballadores e Traballadoras e que, en todo caso, lles sae moi rendíbel. Xa nin que dicir ten dos dereitos sindicais, a política do medo e a represión son cimentos nesta cadea de supermercados", asevera López, quen apunta que a representación da CIG seguirá pelexando para que se respecten os dereitos de todo o persoal.