Eólica Así Non concéntrase diante do Parlamento para exixir a Rueda un cambio radical na súa política enerxética
Fixo entrega, no rexistro do Parlamento, dun Decálogo para un desenvolvemento eólico ordenado, xusto, sustentábel e ao servizo do pobo
Nacional -
Coincidindo coa votación parlamentaria da investidura do presidente da Xunta de Galiza, Alfonso Rueda, a Coordinadora “Eólica Así Non” concentrouse diante do Parlamento de Galiza para advertirlle ao titular da Xunta que a acción xudicial e a mobilización social contra o seu inxusto, insustentábel e ilegal modelo eólico non van cesar nesta lexislatura. Baixo o lema “Rueda escoita, seguimos en loita!”, o movemento Eólica Así Non reafirma o seu compromiso coa defensa do pobo e do territorio galegos contra os abusos das corporacións especuladoras da enerxia e das políticas espoliadoras e antidemocráticas impostas polo Partido Popular desde a Xunta de Galiza e o Parlamento Galego.
![](https://cig.gal/imaxes/adaptadas/780/files/novas/2024/04/11/Eolico%20Asi%20Non/2024-04-11_EolicaAsiNon015.jpg)
Eólica Así Non insta a Alfonso Rueda e ao novo Executivo galego a virar radicalmente de posicionamento con respecto á súa política eólica e enerxética e a actuar con responsabilidade diante da ameaza continua á que se ve sometida a cidadanía galega pola invasión eólica e da situación de parálise e incertidume á que a Xunta condenou o desenvolvemento enerxético eólico do país.
Para Eólica Así Non, o único responsable da inseguridade xurídica e bloqueo que envolve o desenvolvemento da enerxía eólica en Galiza foi e segue a ser o goberno da Xunta do PP, o cal dispuxo nos últimos anos unha nefasta política eólica ao ditado do lobby enerxético, baseada no impulso de reformas normativas “golpistas” e antidemocráticas destinadas a mermar a capacidade de intervención da cidadanía nas decisións políticas e as garantías de protección ambiental do territorio.
Coa chegada de Rueda ao goberno da Xunta, esa política agresiva e regresiva en materia de dereitos cidadáns e democráticos adquiriu maior intensidade, ata o punto de chegar a declarar -con carácter retroactivo- os proxectos eólicos de “interese público superior” para facelos prevalecer sobre calquera outra actividade ou interese xeral.
![](https://cig.gal/imaxes/adaptadas/780/files/novas/2024/04/11/Eolico%20Asi%20Non/2024-04-11_EolicaAsiNon004.jpg)
Ademais disto, tamén cedeu o control dos recursos naturais do país a unha sociedade empresarial con predominio do capital privado, afondou no recorte de prazos de consulta e de participación pública e autorizou preto dun cento de polígonos macroeólicos sen as suficientes garantías ambientais e sen o aval social. Alfonso Rueda tamén foi o impulsor do outorgamento de autorizacións de instalacións macroeólicas fóra das áreas de desenvolvemento eólico e artellou unha campaña inédita de descrédito do poder xudicial galego que traspasa todos os límites da decencia política e democrática.
No decurso do acto, varios representantes das entidades que forman parte da Coordinadora presentaron no rexistro do Parlamento o seu decálogo de reivindicacións para un modelo enerxético xusto, sustentábel e ao servizo do pobo, que foi consensuado polos diferentes sectores sociais nas xornadas “Temos Alternativa” celebradas o pasado ano en Pontevedra.
![](https://cig.gal/imaxes/adaptadas/780/files/novas/2024/04/11/Eolico%20Asi%20Non/2024-04-11_EolicaAsiNon004.1.jpg)
No escrito, dirixido tanto aos novos grupos parlamentarios como ao presidente da Xunta de Galiza, apélase de novo ao establecemento dunha moratoria na autorización de proxectos eólicos e a unha planificación enerxética que estea ao servizo do país e na que se contemple o cumprimento das obrigas ambientais, o aforro e a eficiencia sobre a xeración eléctrica, a intervención pública na produción e distribución da enerxía ou a restauración da participación libre e democrática do pobo na toma de decisións sobre o aproveitamento dos nosos recursos.
As persoas e entidades congregadas diante do Parlamento Galego urxiron a Rueda a abandonar o seu servilismo para coas multinacionais da enerxía e a gobernar verdadeiramente como presidente da Xunta, ao servizo unicamente dos intereses dos galegos e galegas.
Lembráronlle tamén ao renovado titular da Xunta que, malia aos seus intentos de saltarse as regras do estado de dereito e da normativa vixente, a mobilización social e a loita organizada están conseguindo manterlle o pulso á invasión eólica. Polo tanto, fica nas mans do presodente da Xunta seguir apostando por un modelo eólico ilegal, que pon en risco o erario público galego e que condena ao fracaso a nosa transición ecolóxica; ou virar cara a un modelo enerxético alternativo, consensuado co pobo, compatíbel coa preservación da biodiversidade e que revirta en beneficio dos galegos e galegas.