A CIG-Administración rexeita uns orzamentos que non contemplan melloras no emprego público
Delegados e delegadas concentráronse esta mañá diante do Parlamento de Galiza, coincidindo co debate da Lei
Nacional -
Delegadas e delegados da CIG-Administración concentráronse esta mañá diante do Parlamento de Galiza para manifestar o seu rexeitamento a uns orzamentos da Xunta para 2024 -a debate nesta xornada- que, un ano máis, non contemplan as medidas necesarias para mellorar as condicións laborais do persoal empregado público.
![](https://cig.gal/imaxes/adaptadas/780/files/novas/2023/12/19/Concentracion%20CIG-Administracion%20Orzamentos%202024/2023-12-19_CIG-Administracion_Orzamentos0007.jpg)
Como vén facendo desde hai anos, a CIG-Administración denunciou que esta lei “segue avanzando na precarización das condicións laborais do persoal empregado público, e non recolle a posibilidade de recuperar os dereitos perdidos”.
Nese sentido, o secretario nacional da CIG-Administración, Luís Carballo, denunciou que a Xunta non aceptou ningunha proposta de mellora na LEPG, como a de recoller os dereitos do V Convenio e que así o persoal laboral non perda os seus dereitos pola funcionarización masiva.
Carballo afirmou que a Lei de Orzamentos para 2024 “non introduce as partidas orzamentarias precisas para crear as prazas necesarias para o funcionamento da propia administración pública, nin a posibilidade de derrogar a Lei de Medidas, o que permitiría recuperar os dereitos perdidos.
![](https://cig.gal/imaxes/adaptadas/780/files/novas/2023/12/19/Concentracion%20CIG-Administracion%20Orzamentos%202024/2023-12-19_CIG-Administracion_Orzamentos0001.jpg)
Entre outros dereitos arrebatados, Carballo salientou o 1% de acción social, os días adicionais que se suprimiron con reformas pasadas e tamén recuperar cuestións que ten o persoal da administración pendente de volver á mesa de negociación.
A Lei de Orzamentos deste ano, “non só non introduce todas estas cuestións senón que afonda máis no deterioro dos servizos públicos”, concluíu.
Xornada de 35 horas
O secretario nacional de CIG-Administración sinalou que a federación ten en marcha unha campaña polas 35 horas. Lembrou que “outras administracións, como o SERGAS, xa teñen contemplada e concedida esa xornada que nós aínda non temos”.
Explicou que para o persoal é fundamental a redución de xornada mais considerou que, para iso, fai falta máis persoal que faga fronte a este traballo. Apuntou ademais que iso, entre outras cuestións, "tiña que estar recollido hoxe aquí, nos orzamentos da Xunta, pero non está”.
![](https://cig.gal/imaxes/adaptadas/780/files/novas/2023/12/19/Concentracion%20CIG-Administracion%20Orzamentos%202024/2023-12-19_CIG-Administracion_Orzamentos0008.jpg)
Xunto a isto reclamou Comisións de Servizo non discrecionais e negociadas; a implantación da categoría superior no mundo funcionarial; a cobertura de todas as vacantes ou o aumento dos cadros de persoal.
Ademais, a CIG-Administración demanda convocatorias anuais de Oposicións e Promoción Interna; concurso de Traslados aberto e permanente e Complemento de Carreira Profesional digno, negociado e para todos e todas.
Respecto do Plan de Igualdade da Xunta exixe a súa mellora porque o aprobado recentemente non é máis que unha copia da Lei en vigor, sen achegar nada novo.
Outra das cuestión que demanda o sindicato é a revisión salarial anual aplicando o IPC real; a recuperación do poder adquisitivo perdido nos últimos anos e a recuperación do Fondo de Acción Social FAS, equivalente ao valor do 1% da masa salarial.
![](https://cig.gal/imaxes/adaptadas/780/files/novas/2023/12/19/Concentracion%20CIG-Administracion%20Orzamentos%202024/2023-12-19_CIG-Administracion_Orzamentos0005.jpg)
Bombeiros comarcais
No decurso da concentración unha representación do colectivo de bombeiros comarcais, que leva meses mobilizándose en demanda de condicións laborais dignas, aplaudiu aos concentrados, que lle devolveron, á súa vez, os aplausos berrando ao unísono “salarios dignos na administración”.
Os bombeiros comarcais están, desde o pasado venres, na praza do Obradoiro reclamando que as súas demandas sexan escoitadas e que as administracións se aveñan a negociar melloras para garantir o funcionamento deste servizo público esencial.
Novas relacionadas
![](https://www.cig.gal/imaxes/adaptadas/120/files/novas/2023/12/20/2023-12-19_CIG-Administracion_Orzamentos0003.jpg)