Amplíase o seguimento na segunda xornada de folga por un convenio digno no metal de Lugo
Lugo -
A segunda xornada de folga no siderometal e no comercio do metal da provincia de Lugo está rexistrando un seguimento máis amplo que o paro do día 10. Para a CIG-Industria esta resposta maioritaria evidencia a disposición dos traballadores e das traballadoras do sector a pelexar para conseguir uns salarios xustos e mellores condicións laborais.
![](https://cig.gal/imaxes/adaptadas/780/files/novas/2023/05/23/Piquetes%20Metal%20lugo/2023-05-23_FolgaMetall_Piquetes_Lugo_015.jpg)
Como na xornada anterior, o groso do piquete mobilizouse no Polígono do Ceao e as Gándaras, na cidade de Lugo. Aínda que desta volta, ao contar con maior participación o piquete dividiuse en varios gripos para poder visitar máis centros de traballo. Ao seu paso, e ao berro de "convenio do metal, solución", compañeiras e compañeiros que aínda non estaban participando na folga íanse sumando ao paro.
E aínda que incidencia foi algo menor na Mariña, a folga tamén tivo un seguimento practicamente total no resto da provincia, coa actividade das empresas de Vilalba, Monforte ou Sarria paralizada.
"Estamos en pé loitando polo convenio"
O momento central da xornada foi a multitudinaria manifestación que discorreu pola zona da Campiña e que rematou diante da sede da patronal dos talleres, APREVAR. Alí, o representante da CIG-Industria, Afonso Losada, destacou a elevadísima participación tanto na folga como na mobilización: "somos moitas e moitos os que estamos aquí, en pé, loitando polo convenio do metal e o convenio do comercio do metal, pero mañá seremos máis. E temos que seguir na mesma liña, presionando na rúa e explicándolle ás compañeiras e compañeiros cales son os motivos da folga e convidándoos a vir".
![](https://cig.gal/imaxes/adaptadas/780/files/novas/2023/05/23/Mani%20Metal%20lugo/2023-05-23_FolgaMetall_Mani_Lugo_003.jpg)
Losada referiuse á xornada de folga que está convocada para o próximo xoves, día 25, ante a parálise nas negociacións, xa que dende a última reunión, a patronal non fixo ningún movemento nin convocou a mesa. Para este xoves está prevista unha gran manifestación por toda a Avenida da Coruña que sairá ás 12 horas dende o alto de Garabolos até a sede da Confederación de Empresarios.
"Temos que encher Lugo de traballadores/as do metal. A cidadanía ten que saber que os traballadores/as están defendendo o seu convenio, as súas condicións salariais e laborais, as súas condicións de vida", reiterou.
Xa están convocadas cinco xornadas máis de folga
No remate da manifestación xa se adiantou que, ante a falta de avances, a folga continuará e intensificarase de maneira progresiva até tomar carácter indefinido, de ser preciso. Así, a semana próxima farante dous paros xerais o mércores 31 de maio e venres 2 de xuño; pero na semana posterior a folga xa será de tres días: 6, 7 e 8 de xuño.
![](https://cig.gal/imaxes/adaptadas/780/files/novas/2023/05/23/Piquetes%20Metal%20lugo/2023-05-23_FolgaMetall_Piquetes_Lugo_019.jpg)
"A patronal debe tomar nota da resposta que está dando o sector e ten que dar un paso adiante, convocar a mesa e asumir incrementos salariais que garantan o poder adquisitivo, as revisións anuais conforme ao IPC e o abono da totalidade dos atrasos xerados", afirmou Losada.
Garantir o poder adquisitivo dos salarios
A este respecto, o secretario nacional da CIG-Industria, Xoán Xosé Bouzas 'Tupi', aseverou que a folga está consolidada e conta co respaldo maioritario do persoal. "Os traballadores e traballadoras entenden que a perda de poder adquisitivo que sufriron durante os últimos anos non se palía simplemente co recollido no acordo de negociación colectiva que acaban de asinar en Madrid".
![](https://cig.gal/imaxes/adaptadas/780/files/novas/2023/05/23/Piquetes%20Metal%20lugo/2023-05-23_FolgaMetall_Piquetes_Lugo_012.jpg)
Apuntou que neste momento "cómpre recuperar a capacidade adquisitiva dos anos 2021 e 2022, nos que os salarios perderon máis dun 13%. Este é un convenio no que a patronal se está facendo máis dura á hora de asumir os atrasos que debe pagar polo ano 2022. E para os próximos tres anos non vale tampouco unha revisión topada ao 1%, senón que se ten que garantir o mantemento do poder adquisitivo".