Convocan protestas en DomusVi Ribadumia ante as imposicións da empresa e para reclamar a compensación de festivos en tempo
A mobilización terá lugar este venres 9 diante da residencia de maiores ás 11:30 horas
Ribadumia -
O comité de empresa da residencia de maiores DomusVi de Ribadumia, integrado por cinco delegadas da CIG, vén de anunciar mobilizacións para rexeitar as imposicións da dirección e reclamar a compensación dos días festivos traballados en tempo libre. A protesta terá lugar este venres 9 diante da residencia ás 11:30 horas.
![](https://cig.gal/imaxes/adaptadas/780/files/novas/2024/02/08/24-02-07_Rolda_Prensa_DomusVi_Ribadumia_02.jpeg)
Catro das cinco representantes da CIG en DomusVi, compareceron onte en rolda de prensa xunto ao secretario comarcal da CIG-Servizos de Pontevedra, Iván Veiga, para denunciar os cambios de quenda impostos pola empresa de xeito unilateral dende o pasado 1 de xaneiro. “Empeorou os horarios do cadro de persoal e fíxoo sen cumprir os requisitos que se esixen, xa que o calendario anual ten que ser pactado coa representación legal das traballadoras/es”.
Neste senso, incidiron en que ao supoñer unha modificación substancial das condicións de traballo a compañía ten que abrir un prazo de 15 días para negociar os novos horarios e os cambios de quenda.
Ademais, fixeron fincapé en que o cuadrante entregado pola empresa supón que haxa semanas nas que non se cumpren os descansos legais, non se respecta o cómputo de xornada anual, nin tampouco a compensación en días festivos. “Esta é unha cuestión fundamental, que motivou a modificación de quendas; as traballadoras/es teñen xornada de luns a domingo, incluíndo festivos, e no seu convenio colectivo (e nunha sentenza doTribunal Supremo) establécese que esta compensación ten que ser en tempo de descanso”, detallou Veiga.
![](https://cig.gal/imaxes/adaptadas/780/files/novas/2024/02/08/24-02-07_Rolda_Prensa_DomusVi_Ribadumia_01.jpeg)
Mais as empresas do sector non respectan esta premisa, especialmente DomusVI, polo que o persoal ten presentado reclamacións individuais nas que se recoñece que a compañía non compensa correctamente o traballo en festivos. “Dende hai ano e medio estamos intentando negociar esta cuestión; por unha parte aseguran que queren implantar colectivamente a compensación en tempo, pero por outra chantaxean o persoal para que acepte unha modificación horaria e de quendas que é peor que a actual a cambio da compensación de festivos”.
Ademais, DomusVi está a ofrecer a posibilidade de compensar economicamente o traballo en festivos, e a un prezo inferior ao que xa teñen recoñecido nas sentenzas individuais as traballadoras/es. “Polo que nos negamos a asinar ese acordo, porque nos parecía unha chantaxe, e a empresa optou por impoñer a modificación horaria”.
En consecuencia, o cadro de persoal vese na obriga de presentar un conflito colectivo non xulgado e de iniciar unha campaña de mobilizacións -decisións que foron adoptadas en asemblea-, sen descartar a posibilidade de convocar folga “porque as traballadoras/es están fartas desta situación e de que non se respecten os seus dereitos”.
Convenio galego de residencias privadas
Dende a CIG-Servizos fixeron fincapé en que o sector das residencias privadas está a rexistrar un constante medre en Galiza, até o punto de que representa xa o 75 do total. “Unha situación que responde ao modelo privatizador que está a aplicar a Xunta do PP e que para nós é un auténtico fracaso porque só busca o beneficio económico das grandes empresas e dos fondos de investimento, a costa de precarizar as condicións laborais e da perda de poder adquisitivo das traballadoras/es”.
Fronte a isto, na central sindical apostan por unha intervención das administracións públicas no sector, ben xestionando directamente as residencias privadas e subrogando o persoal, ben garantindo a equiparación salarial coas traballadoras/es das residencias públicas.
“Facendo unha comparativa atopamos que unha xericultora dun centro público, que é a categoría laboral máis común nunha residencia, chega a cobrar até 4000 euros máis ao ano ca unha dunha residencia privada. E que o persoal das privadas fai unha media de 250 horas máis ao ano que o das públicas. Por iso administracións teñen que tomar cartas no asunto para rematar con estas desigualdades e faise imprescindíbel cambiar o modelo privatizador da Xunta”.
Ao mesmo tempo, lembraron que a día de hoxe as traballadoras/es teñen salarios por debaixo do SMI, “polo que poremos todo o noso empeño na negociación do convenio galego de residencias privadas que comeza hoxe para lograr unhas condicións dignas e uns salarios xustos”.