As traballadoras da Escola Infantil Merlín seguen en loita para exixir o cobro dos seus salarios
A empresa débelles as nóminas de maio de xuño
Ames -
As traballadoras da Escola Infantil Merlín (situada en Bertamiráns, no Concello de Ames) proseguiron na tarde deste mércores coa súa loita para cobrar os salarios que lles debe a empresa do mes de maio e de xuño e para que se garanta a viabilidade desta. Malia esta situación “insostíbel” manteñen a súa profesionalidade acudindo día a día a traballar e incluso reorganizando o seu período de vacacións para que a escola poida seguir funcionando dado que a empresa non contratou persoal suficiente.
![](https://cig.gal/imaxes/adaptadas/780/files/novas/2024/07/11/2024-07-10_EscolaInfantil_merlin_04.jpg)
As contas que lles foron entregadas a pasada semana á delegada de persoal e á CIG-Ensino non revelan que a empresa non sexa viábel, "senón que existe un problema de xestión porque, entre outras situacións anómalas, hai gastos e accións que a empresa sigue sen poder xustificar correctamente".
Ante esta situación o colectivo de traballadoras manifestouse onte á tarde polas rúas de Bertamiráns, nunha marcha que contou, de novo, co apoio das familias usuarias que están a ser nestes momentos, xunto cos nenos e nenas, “o motivo polo que seguimos vindo a traballar cun sorriso”.
A marcha transcorreu desde as instalacións da empresa até o Concello e rematou cunha intervención tanto do secretario comarcal da CIG-Ensino como da delegada de persoal. Ambos instaron a Xunta a tomar medidas, dado que se trata dunha empresa que recibe unha subvención do 100% do custe da súa actividade e presta un servizo esencial, como é a atención da poboación de 0 a 3 anos.
![](https://cig.gal/imaxes/adaptadas/780/files/novas/2024/07/11/2024-07-10_EscolaInfantil_merlin_02.jpg)
Así mesmo, anunciaron que recorrerán á Inspección de Traballo e á xustiza de ser necesario, sen renunciar a seguir mobilizándose. Baixo a consigna “Polo traballo feito, o salario é un dereito”, anunciaron unha nova concentración para o martes 23 deste mesmo mes de novo diante da escola.
As traballadoras aseguran estar “fartas da incerteza e de que cada día se lles diga unha cousa distinta, desde que a escola se vai traspasar até que vai continuar a actividade e que solicitarán a subvención para o vindeiro curso”. Neste sentido, esta última solución entenden que é “pan para hoxe e fame para mañá” porque o diñeiro que se recibiría este mes de xullo realmente é para pagar os seus salarios a partir de setembro e non os atrasos, polo que de novo se volverán atopar con problemas nos próximos meses.