Mobilización nas Pontes para reclamar futuro industrial e con emprego
As Pontes -
A Praza do Carme acolleu na tarde deste xoves unha concentración para reclamar unha transición xusta para As Pontes e solucións urxentes que garantan un futuro industrial e con emprego para a localidade. Fronte á propaganda e a perda de postos de traballo demandouse a continuidade laboral para o persoal das auxiliares, a posta en marcha dun plan industrial que garanta a creación de postos de traballo e a economía da localidade, a creación de chan industrial e a materialización dos proxectos anunciados.
![](https://cig.gal/imaxes/adaptadas/780/files/novas/2024/06/13/As%20Pontes/24-06-13_AsPontes_04.jpg)
A mobilización faise na véspera de que o persoal das auxiliares que estivo traballando nas tarefas de pre desmantelamento da térmica pase ao desemprego, incumpríndose unha vez máis as garantías de continuidade e as promesas dunha transición xusta. Sen ningún dos proxectos industrias anunciados en marcha, cunha inacción sangrante das administracións ante os incumprimentos de Endesa e sen alternativas económicas e de emprego, As Pontes vive unha situación límite.
Por iso, o responsábel local da CIG das Pontes, Óscar Maseda defendeu intensificar a mobilización como único camiño para arrincar do Goberno estatal, da Xunta e do Concello "actuacións concretas e reais, que comprometan e obriguen a Endesa e que dean solución ao declive industrial, económico e social que padece a vila e a súa contorna".
Denunciou que dende o anuncio do peche da central, e pesar das masivas mobilizacións, os gobernos foron incapaces de dar solución ás reivindicacións "para a concreción de proxectos, prazos, garantías e emprego, garantindo a continuidade laboral do persoal da industria auxiliar neste proceso". Ao contrario, salientou, déixase todo o futuro da vila "nas mans dunha empresa privada como Endesa que se move en exclusiva en base aos seus intereses".
![](https://cig.gal/imaxes/adaptadas/780/files/novas/2024/06/13/As%20Pontes/24-06-13_AsPontes_03.jpg)
Maseda criticou que nin sequera se levaron adiante medidas para promover a formación e impulsar a reinserción e o futuro laboral dos compañeiros e compañeiras da industria auxiliar, do transporte do carbón, ou do persoal trasladado de Endesa. "A todas e todas eles asístelle o dereito a poder seguir vivindo e traballando nas Pontes", aseverou.
Fronte a isto, o responsábel sindical reclamou a continuidade laboral para o persoal da industria auxiliar, un plan industrial que garanta a creación de emprego e o futuro económico da localidade, a creación de chan industrial que non dependa das instalacións de Endesa para axilizar a implantación de novas empresas "e proxectos laborais que deixen de ser promesas e se fagan realidade". Pois dende que se deron a coñecer propostas como a fábrica de pneumáticos de Sentury ou as plantas de hidróxeno verde "aínda non se colocou unha soa pedra".
![](https://cig.gal/imaxes/adaptadas/780/files/novas/2024/06/13/As%20Pontes/24-06-13_AsPontes_02.jpg)
Exixiu unha transición realmente xusta e menos propaganda e anuncios que "nos pintan un futuro idílico de emprego e bonanza", cando a realidade "é a que todos e todas vemos: desemprego, precarización, promesas incumpridas e un futuro a curto prazo desolador".
Neste contexto, Maseda chamou a non caer na resignación e instou a seguir "mobilizándonos para esixir garantías de emprego e a reindustrialización da nosa vila".