Coa ocupación iniciada, as traballadoras foron recibidas pola directora territorial a quen lle expuxeron a situación laboral do sector, os incumprimentos das empresas ou as carencias na asistencia que se presta ás persoas usuarias.

Lembráronlle que a CIG ten solicitada dende o pasado mes de setembro unha reunión coa conselleira de Política Social “que a día de hoxe segue sen responder, nin amosou tampouco ningún interese por coñecer as demandas das traballadoras”. No encontro, explica o secretario de Negociación Colectiva da CIG-Servizos, Adolfo Naya, denunciouse a precariedade laboral e salarial que a patronal pretende perpetuar neste convenio, así como as diferencias coas condicións de traballo que existen con respecto aos centros de xestión pública.

Neste senso, engade Naya, manifestouse o indignaciónr que hai entre o persoal polo abandono da Xunta de Galiza, malia ter as competencias en materia de política social, e o rexeitamento á política de privatizacións dos servizos de coidados “que só serve para que os grandes grupos do sector e os fondos de investimentos engorden os seus beneficios a conta de explotar o persoal e deteriorar a calidade asistencial”.

Tamén se lle deu traslado da sobrecarga de traballo que teñen que asumir as traballadoras polas ratios insuficientes, o escaso tempo que lle poden dedicar a cada persoa usuaria, ou os problemas derivados da decisión da Xunta de ingresar persoas con doenzas psiquiátricas nas residencias de maiores -a pesar de que nin os centros están acondicionados, nin o persoal ten a formación adecuada para ofrecerlle a atención que precisan-.

A directora territorial, pola súa parte, tomou nota das demandas e dixo que daría traslado destas á máxima responsábel da Consellaría. “Agardamos que isto sirva para que a conselleira Fabiola García nos responda, que a Xunta se implique dunha vez e que intermedie para desbloquear a negociación do convenio colectivo, garantindo unhas condicións dignas para as traballadoras deste sector esencial”.

Catro días de folga e unha manifestación nacional

A CIG ten convocada folga nas residencias privadas de maiores e centros de día para os días 10 e 22 abril e 7 e 21 de maio en resposta á parálise na negociación colectiva por parte da patronal, que deu por rachada a mesa tras presentar en setembro pasado unha proposta inasumíbel para as traballadoras. Ademais, o 26 de abril, a CIG-Servizos ten convocada unha manifestación nacional en Compostela e xa avanza que se adoptarán novas medidas se non hai resposta da patronal.