De feito, explican que actualmente as traballadoras que están a substituír o persoal que está de baixa por incapacidade temporal, tres traballadoras con xornada completa, tan só cobren o 55’2 % das horas das traballadoras titulares (63 por 114 horas semanais de traballo).

Unha cifra que cualifican de " absolutamente desproporcionada sobre a porcentaxe de alumnado presente neste curso, nomeadamente no mes de febreiro.  Entendemos pois, que non se dan as condicións obxectivas de proporcionalidade en redución de alumnado coa redución de postos de traballo proposta pola empresa".

Ademais é coñecido que unha das traballadoras que actualmente substitúe a titular que pretenden despedir "ten intención de rematar a súa relación laboral coa empresa a curto prazo o cal fai que o despedimento sexa totalmente improcedente".

Tras a convocatoria de dúas concentracións diante da Escola Infantil Merlín, a representación sindical tentou pórse en contacto co propietario en múltiples ocasións co fin de manter unha reunión e pedir a revogación do despedimento, cousa que non foi posíbel debido ao rexeitamento da patronal a manter reunións de xeito presencial.

"Condenamos abertamente esta conduta que non fai máis que porfiar no desprezo da empresa cara as súas traballadoras e ademais atenta gravemente ao dereito da delgada sindical a ter información en situacións de gravidade como é a da represión sindical e despedimento improcedente", apunta a CIG-Ensino.

Lembran que a Escola infantil Merlín está totalmente financiada pola Xunta de Galiza dentro das liñas de subvención das escolas infantís privadas 0-3 e que depende principalmente do número de admisión de alumnado cuxa liña de financiamento para esta escola neste curso 2024/2025 será de 190000 euros de cartos públicos cousa que non foi capaz de manter a calidade educativa perdendo así servizos fundamentais como a parella educativa.