O secretario comarcal da CIG-Ensino, Rubén Monteagudo, recalcou durante a protesta que se trata "dunha clara vulneración das liberdades sindicais que denunciaremos en todos os estamentos necesarios". Lembrou que escola infantil privada está subvencionada integramente pola Consellaría de Política Social -este curso con máis de 150 mil euros- e que a maiores lle cobra cotas ás familias por varios servizos.

Critica que o empresario Carlos Porto Santoro "traspasou varias liñas vermellas" nos últimos tempos “e a última foi despedir unha traballadora e reducirlle a metade da xornada a outra  con total nocturnidade e aleivosía, e no medio do curso escolar". Acusa o empresario de mentir sobre os datos reais de matrículas para xustificar "o inxustificábel".

Segundo os datos que lle facilitou a empresa á Xunta para recibir a subvención pola gratuidade da matrícula, son 41 crianzas as usuarias da escola fronte ás 49 que había o curso pasado. Pero na carta de despedimento indícase que a baixada da matrícula foi de 57 a 33 "polo que, ou ben estamos ante unha ilegalidade e mentiulle á Xunta con intención fraudulenta de obter financiamento ou ben está incumprindo a normativa laboral, algo que dirimirán os xulgados”, incidiu Monteagudo.

A empresa elude a súa responsabilidade

Alén desta situación, a empresa acaba de mandar un comunicado ás familias no que está terxiversando e manipulando a información, "á vez que minimiza a súa total responsabilidade na situación que se está a vivir" e non amosa ningunha empatía polo persoal que leva máis de ano e medio con atrasos nas nóminas e vivindo en situación de incerteza sobre cando e como van cobrar.

"Dar por pechado o tema dicindo que xa abonaron os salarios de novembro e decembro é asumir que pode vulnerar os dereitos laborais e salariais das súas traballadoras sen ningún tipo de consecuencia nin de emenda. Ademais nega cinicamente incumprimentos de convenio, falta de comunicación coas traballadoras e xoga á ambigüidade coas contas", censura.

Diante disto, as traballadoras víronse obrigadas a responder nun comunicado enviado ás familias no que aseguran que en ningún momento o empresario intentou sentar con elas e buscar algún tipo de alternativa aos "problemas" que el describe agora.

“Nós sempre estivemos abertas a dialogar e así o demostran os múltiples correos, solicitudes de reunións e demais. O único que intenta a empresa con isto é botar balóns fóra sobre a súa xestión e "quitar" de enriba compañeiras que, sendo sempre respectuosas cos nenos e nenas e ofrecendo unha profesionalidade e calidade educativa exemplar, defenderon os seus dereitos, uns dereitos tan básicos como o de cobrar polo seu traballo”, sinalan nese comunicado.

Engaden, así mesmo, que “a situación foise deteriorando tanto que algunhas de nós rematamos nunha situación física e mental insostible e actualmente atopámonos nunha situación de incapacidade temporal e tendo que solicitar á mutua o pago directo das nosas nóminas.  Que un empresario sempre poña a escusa do "lento ritmo de pagos da Xunta" é unha broma de mal gusto, cando, entre outras cuestións, debera coñecer previamente como funcionan as administracións e os seus procesos”.

"É un fracaso -afirman- que un empresario non sexa capaz de sacar adiante unha escola das condicións de Merlín, totalmente subvencionada. É un fracaso que teñamos que  pedir as contas cada tres meses e que sempre se nos dean números inventados, e que para cobrar unha nómina teñamos que solicitar reunións ao empresario, presentar escritos, reclamacións ante a inspección, notas de prensa e incluso concentracións”.

Conclúen lembrando que “dende hai meses puxémonos a disposición da empresa para botar unha man en todo o referido a un posible traspaso, cuestión que nunca estivo realmente enriba da mesa do empresario e a súa familia e só é unha cortina de fume, que xusto agora pretenden continuar afirmando miserablemente que ningunha persoa quere coller a escola porque terían que subrogar os nosos postos de traballo, cando esta é unha previsión legal habitual. Por que nunca temos información nin transparencia por parte do empresario sobre este asunto?" pregúntanse as traballadoras.