Nova mobilización contra a precarización das condicións laborais nas contratas de Inditex
Coa protesta demándase tamén da readmisión do traballador de SARPEL despedido
A Coruña -
Traballadores e traballadoras das contratas de Inditex volvéronse mobilizar este martes diante da sede do grupo en Arteixo en rexeitamento á precarización das condicións salariais e laborais que a multinacional pretende impor ás súas auxiliares aproveitándose da emerxencia sanitaria.
![](https://cig.gal/imaxes/adaptadas/780/files/novas/2020/12/15/SARPEL/20-12-15_Mobilizacion_Sarpel_02.jpg)
Este é o caso de SARPEL, empresa que realiza o mantemento eléctrico das instalacións de Inditex no Polígono de Sabón dende hai moitos anos que, de un día para outro, comunicoulle a cinco traballadores que lles baixaba o soldo en 400€ (que perciben en concepto de dietas pero que están incluídas na nómina) e o traslado, ademais, dun destes operarios a Asturias e o desprazamento doutro compañeiro.
Cando o traballador rexeitou ir a Asturias por motivos de conciliación familiar, a resposta de SARPEL foi despedilo de maneira fulminante e cun claro carácter exemplificador para o resto do persoal, tanto desta auxiliar como do conxunto de empresas que traballan para Inditex.
A este respecto, Roberto Pérez, responsábel de comercio da CIG-Servizos da Coruña, explica que Inditex deu orde a SARPEL e a outra contratas de que rotara ao persoal por outros servizos das empresas, co único obxectivo de que non consoliden dereitos, non poidan reclamar melloras laborais e salariais e aforrar cartos deste xeito. De feito, SARPEL actuou sen abrir sequera a negociación para unha modificación substancial das condicións laborais, como sería preceptivo.
![](https://cig.gal/imaxes/adaptadas/780/files/novas/2020/12/15/SARPEL/20-12-15_Mobilizacion_Sarpel_04.jpg)
En calquera caso, subliña que non estamos ante un proceso de redución de persoal nin de baixada da carga de traballo, xa que SARPEL meteu ao instante a dúas persoas para ocupar o lugar do traballador despedido e do desprazado, pero afondando na precarización destes postos xa que non os contratou directamente, senón que están por unha subcontrata de SARPEL.
Por iso, con esta protesta quérese demandar a readmisión do compañeiro despedido, mais tamén que Inditex e as contratas respecten os dereitos laborais e salariais que tanto lles custou conquistar a estes traballadores e traballadoras.