A marcha a pé, na que tamén participaron numerosas/as veciños/as da localidade, arrincou pasadas as 11:00 horas da praza do Concello e rematou por volta das 12:00 horas diante do establecemento hoteleiro situado na Illa da Toxa. Durante o traxecto coreáronse consignas como "Non aos despidos no Hotel Balneario", “Non ao ERE no Hotel Balneario”, “Non aos despidos no grupo HOTUSA”.

Ao remate da mobilización, o responsábel da CIG-Salnés, Xoán Xosé Bouzas, tomou a palabra para agradecer a solidariedade amosada unha vez máis polos representantes da central sindical nas distintas empresas da comarca e insistiu que a CIG reclamará xudicialmente a nulidade dun ERE “que é inxusto e non está xustificado”.

E tamén demandará que o informe da Inspección de Traballo con respecto ao ERE sexa negativo. Ademais, a central denunciará diante da autoridade laboral que durante as xornadas de folga convocadas recentemente contra os despidos a compañía cubriu os postos dalgúns folguistas con persoal externo.

Bouzas lembrou que unicamente 10 das 36 persoas traballadoras do hotel aceptaron a proposta da empresa de precarizar as súas condicións laborais para non seren despedidas. “Agora tocoulle tamén ás camareiras de piso, que onte mesmo recibiron un ultimato: ou aceptan converter os contratos en fixos descontinuos ou van á rúa”.

E censurou que estas decisións responden a unha estratexia coa que por unha parte se pretende externalizar servizos e pola outra desfacerse do persoal “máis incómodo” e con maior antigüidade na empresa. De feito, no ERE están incluídos 4 dos 5 membros do comité. E tamén todas as persoas que se atopaban de baixa médica.

E todo isto a pesar de que se veñen de coñecer as previsións económicas feitas públicas polo propio grupo HOTUSA -propietario do establecemento grovense- para o ano 2014. A cadea hoteleira estima que pechará o exercicio tanto con récord de facturación (1560 millóns de euros) como de beneficios netos (115 millóns).

Finalmente, o responsábel sindical anunciou a convocatoria de 10 novas xornadas de folga até final de ano. As primeiras terán lugar os vindeiro martes 17, xoves 19 e sábado 21 de decembro.