A sentenza anula as sancións por consideralas desproporcionadas e con motivos discriminatorios contra as traballadoras pola súa actividade sindical, garantindo así a protección dos seus dereitos fundamentais.

Segundo explica Xosé Paz, da CIG-Servizos, “esta represalia e vulneración do dereito de liberdade sindical ás traballadoras por parte de Froiz debeuse á loita activa desenvolvida por estas delegadas -e así o recoñece a sentenza-, nas concentracións, manifestación e  convocatoria de folga, cando se estaba a negociar o convenio de Comercio Alimentación de Lugo.

Feitos probados

Na sentenza recóllense como feitos probados que as traballadoras retiraron produtos caducados do supermercado (catro lombos ibéricos valorados en 128,48 €) sen pagalos, seguindo unha práctica habitual na empresa a pesar da normativa interna que prohibía esta acción.

A consecuencia disto, Froiz impúxolles unha sanción de suspensión de emprego e soldo por 14 días, alegando faltas moi graves (fraude e desobediencia). As traballadoras alegaron que a sanción era unha represalia pola súa actividade sindical durante as negociacións do convenio colectivo.

Segundo a sentenza a sanción considerouse nula porque a empresa non acreditou que os feitos constituían faltas moi graves, xa que o valor dos produtos era reducido e non causou prexuízos graves.

Tívose en conta ademais que existía unha práctica tolerada de retirar produtos caducados, polo que a sanción foi considerada desproporcionada, entendéndose que foi, efectivamente unha represalia pola actividade sindical das traballadoras, vulnerando os artigos 24 e 28 da Constitución Española (dereitos á tutela xudicial efectiva e á liberdade sindical).