Convocada folga nas instalacións deportivas municipais de Santiago ante a precarización laboral
Anuncian que impugnarán os servizos mínimos decretados, que consideran abusivos, ao non ser esta unha actividade esencial
Nacional -
CIG e UGT anunciaron esta mañá, en rolda de prensa, o inicio, a partir deste sábado, día 5 de abril, dunha folga indefinida nos fins de semana nas Instalacións Deportivas Municipais do Concello de Santiago, xestionadas pola empresa Lacera. A convocatoria responde á falta de avances nas negociacións coa empresa e o Concello para mellorar as condicións laborais do cadro de persoal.
Paulo Rubido, representante da CIG, que compareceu xunto a Juan Carrera, responsable da Federación de UGT na provincia da Coruña e os delegados Iñaki Blanco, Javier Pinaque e Alberto Quintana, denunciou as diferenzas nas condicións laborais entre os cadros de persoal do concello, mesmo aplicando convenios similares. “O persoal de Lacera reclama o mesmo acordo que teñen as traballadoras de limpeza do Concello, para acadar unha mínima igualdade en dereitos como licenzas, permisos, antigüidade e unha retribución algo mellor”, explicou.
A folga, que afecta a un cadro de 44 persoas, ten carácter indefinido e non interferirá nas competicións escolares, priorizando a conciliación familiar. “Queremos causar o menor dano posible á poboación, pero a resposta da alcaldesa e da empresa só agrava o conflito”, sinalou Rubido.
Neste sentido destacou que se esgotaron todas as vías de negociación co concello, a alcaldesa Goretti Sanmartín e a empresa, sen resultados positivos. “Non nos queda máis remedio que ir á folga para que as nosas demandas sexan atendidas”.
Lembrou, ademais que non é a primeira vez que xorde un conflito destas características. “A externalización de servizos propios do Concello, xustificada por unha suposta eficacia, tradúcese nun abaratamento dos custos a costa de precarizar as condicións das traballadoras e traballadores”, denunciou.
Servizos mínimos
Rubido criticou a resposta de Sanmartín por decretar uns servizos mínimos do 50% para os sábados e domingos, “co claro obxectivo de boicotear a folga”, dixo. Unha medida que cualificou de “represiva e autoritaria que vulnera o dereito á folga”.
O representante da CIG cualificou de “tomadura de pelo” que se considere esencial un partido de terceira rexional ou unha competición menor. “Non estamos ante unha actividade esencial. A folga convocouse en fins de semana para non prexudicar as actividades escolares, demostrando o noso compromiso coa cidadanía. A alcaldesa equivócase e debe rectificar”, insistiu Rubido, anunciando que impugnarán os servizos mínimos e pedirán medidas cautelares e responsabilidades á alcaldesa “por ditar un decreto que vulnera a legalidade”.
